Саран ошсо А.С.Пушкин лемсэ Национальной библиотекасо

Чадыковонь 16 чистэ, А.С. Пушкин лемсэ библиотекасояк ютавтозель Эрзянь келень чинтеньалтазь кенярксчи. Эйзэнзэ сакшность ломанть аволь ансяк Саранскойстэ, республикань буетнестэяк, инжеть Самарасто,  Санкт Петербургсто...

Коень коряс, кенярксчисэнтькирвазтезельРаськень Штатолось. Чансть сонзэ вельмевтемс максозель «Масторава» эпосонть пурныцянтень-теицянтень А.М.Шароновнэнь.

«Тюштя» моронть морызь «Морама» куронь морыцятне Геннадий Дулкин ды Иван Ацапкин. Сынст марто морасть залсо пурнавозь ломантькак.

Коень коряс ютавтозель «Чатьмонемань минута». Ледстинек сеть эрзятнень, конат иень перть тусть юткстонок, конат свал кармить оймесэнек. 2022 иень А.П. Рябовонь лемсэ Казнень Лауреатонь Казнесь максозель Александр Архиповнень  Петра ошсо эриця од ломанентень, кона эсь олясо тонавтни эрзянь келенть,муи шка питневтеме «Эрзянь мастор» кулялопанть теемантень.

Покш инжетнень ютксольть МР-нь Культурань, национальной политикань ды архивень тевтнень коряс министрань васенце полавтыцясь А. И. Карьгин, МР-нь Госсобраниянь Председателень прявт советникесь И. М. Москаев, Регионъютконь эрзянь ды мокшонь раськень вейсэндявксонь прявтось Ю. А. Мишанин. Сынь ёвтасть эрзятненень лембе валт ды паронь арсемат кенярксчинть кувалма, казсть казнеть.

Кенярксчись ютась лембестэ. Вастовинь тосо умонь ялган марто: Маризь Кемалень, В.С. Брыжинскиень, (мельспаро тень ульнесь марямс сынст превейтьванькс эрзянь кельсэ кортамост), Ю.С. Цыпинань, Г.С.Гребенцовонь ды од ялган мартояк, конат састь те покшчинтень. Истя лиссь: колоньгеменде ламо иень перть, зярс мон пиян-лакан эрзянь келень тевсэнть, весе, кие мезе-бути эрявикс теитиринь келенть ванстомга, монень теевсть малавиксэкс. Чарькодеви, кодамо кеняркс тень канды эрьвань марто вастовомась! Ламот сынст ютксто ульнесть казезь те чисэнть эрьва кодат казнесэ. Од ялгам Ирина Петрова сась мик Самарасто. Сон – дополнительной образованиянь педагог, тейни эйкакшонь куронзо марто эрьва кодат келень тонавтоманть лездамга-шождалгавтомга кедъёнкст: мультфильмат, кроссвордт ды ламо мезе лия.

Пек вечкевсть Артём Мамаевень, Ицялбуень «Вастома» ансамблянть, Анна Атласовань, Елена Воронинань, Антонина Масягинань, Ирина Рузанкинань - «Келу» ансамблясо морыцятнень, Нина Спиркинань морост. А кода парсте морасть вишкатне –"Меремчата" фольклоронь студияньэйкакшонь "Виртеня" курынесь! Сынь ушодызьгак покшчинь концертэнть.Кода кепедевсь оймеёжом, зярдо сценанть лангс кузсь Людмила Макушкина, Покш Березник ёнксонь Парынзэле велень од ялгам, ды пек парсте морызе «Мон - эрзян» мором. Сюкпря, Людмила! Мельспаросо кадовинек миньгак: Н.С.Бородачёва, Л.И.Ендолова, П.А.Мамаевмарто, конат якинек те покшчинтень. Вечкевсть минек моронок, монь видео-невтематне «Мезесь ютась иень перть» ды «Мезес эряви анокстамс».

Покш Березникстэ покш выставка марто, кона ёвтни Ине войнань шкасто Сура леенть чирева стявтозь пирявксонть историядонзо, сакшнось те тевенть сыргавтыцясь Сергей Косынкин.Кортамосонзо Сергей тешкстась, зярдояк а эряви стувтомс войнань шкань стакачитнеде, ломаненек ине подвигест ды изнямонтень алтазь тевест.

Мейлеякинек путомо цецят ине скульпторонть С.Д. Эрьзянь кеврунгонтень.Теезельть тантей каванямкаткак.

Кенярксчинть анокстыцянь ды ютавтыцянь Эрзянь раськень койтнень-кирдатнень, келень ванстомань ды кастомань-кепетемань фондонь прявтось Татьяна Ивановна Ларина тердинзе весень вейсэндямс эрзянь культуранть ды келенть ванстомга тевентень, ёвтась весенень сюконямонь валт ды ламонень казсь казнекс книгат.

Кенярксчись ютась. Мейсэ сон кецявтымим ды арсевтимим? Светлана Пивкина ёвтась пек паро мель: тейнемс мельстуиця вастовомат эрзянь содавикс ломань марто. Зяро содамочи таштавсь сыре ломантнень превсэ-седейсэ! Кода вадря ули, бути сынь кармить те оймень сюпавчисэнть явомо седе одтнэнь марто. Кеман, те меленть шожда топавтомс.

 Мезесь ацирьгавтымим? Кенярксчись ульнесь оймсема чистэ, ансяк аволь ламо эрзят пурнавкшность. Кияк арасель вечкевикс «Сятком» пельде, эзть пачкоде кияк эрзянь покшчис мельстуиця «Сияжаром» пельдеяк, Р.Б.Щанкина ульнесь, арсян, «Эрзянь правданть», «Ламзуренть» ды эрзянь авань «Литова» вейсэндявксонть пельде ськамонзо. Покш мелем ульнесь кунсоломс тень, ды, арсян, лиятнененьгак,«Вал» поэзиянь курос совицятнень валморосткак. Паряк, аволь весе арсить Эрзянь Келень Чись - весе эрзятнень кенярксчи? Оймсема чистэ важодеманть кис ярмак а пандыть. Ансяк, те покшчись, арсян, аволь важодема. Кодамо покш мелем теньсэ манявомс, ды а кемекставомс сеньсэ: минь вейсэ тейтяно вейке тев – кепедтяно-вансттано вечкевикс тиринь эрзянь келенек! Кеман, Эрзянь келень Чинть ютавтомань коесь а прядови, сон поладови седе товгак.