Статья 10. Еретики думают, что им известна вся глубина священных книг, а между тем сплетают басни, и когда терпят наказание заслуженное, то говорят, что страдают за веру

1) Апостол

397 Ащели кто мнится ведети что, не уничтоже разуме яко же подобает разумети.

2) Кормчая

398 Вся бо Божественая писания прошед, господския же заповеди, и апостольские, и отец богоносных учения; рекше законная правила, и скоропытне рассмотревше, многая убо в них изобретше развращения, яже от еретик, неприсующе сия по своим похотем прелагаху, яже на вхождение свое многи соблазны и распри положьше, святей соборней апостольстей церкви: их же чтуще слабии человецы и помраченнии умом, не ведуще книг святых разума, ни сил, лежащих в них, но точию писмена извыкше, сладости же их не вкусивше, мнятся вожди быти инем, а сами слепи суще.

3) Макарьевская Минея

399 Мнят бо сия ведуще окаяннии глубины книжные, и хотяще толковати я̀, и развращают на свою им пагубу, якоже пишет апостол Петр глаголя. Возлюбленый брат наш Павел, по даннеи ему премудрости написа вам якоже всех епистолиах, глаголя о сем. В них же есть другое неудоб разумно, еже не научении и не утвержении, развращают яко же и прочая книги на свою им пагубу Мы же убо взлюблении, преже разумевающе блюдетеся, да не беззаконных льсти пристающ отпадете своего утвержениа видите ли како ти святии послушествуют. Да видевше я̀ и разумевши изгоним вон. Аки враги суща креста Христова. Вся бо преданыя законы святей Божии церкви похуляюще, своя си учения честно творят бающе не каки басни якоже учит блясти отец их диавол. Аще бо неподобно есть блядий тех правдами обличити, сквернят бо словесы их яких и древле рече вся поднебесная. Но обаче мало поведав о прочем молчу втайне бо бывающая от них. Рече апостол срам есть глаголати, мнози же не ведят, что суть ереси их, и мнят я̀ за правду стражущая, и хотяща нечто восприяти благо от Бога за узы и темница. Но да слышат и о том Павла глаголюща, аще стражет кто не венчается, аще незаконно стражеть.

4) Соборник Μалый

400 Уподобися царство небесное человеку, сеявшему доброе семя на селе своем. Спящим же человеком, прииде враг его и всея плевелы посреде пшеницы. И иногда инеми глаголет, якоже потреба недугующих принуди, ибо различны суть ереси, яко ин инако развратися от правого благочестия кождо ереси начальник. Сего ради и иногда иного возрасти возбраняющи нечестие, якоже потреба недугующих принуди рече. Недугущии суть развратившиися от благочестия в нечестие, еретическими хулы, ариане, македонияне, евномияне, аполинариане, манихеи, маркионити. Маркион убо хулит и Манихей хулит, но инако. Инако бо Аполинарий хулит и инако Арий. Тако же и Евномий инако хулит, и инако Македоний. Якоже коемуджо ереси начальнику якову хулу привсея когда диявол? сице убо различным от диявола привсеянном ересем, имиже прельстившиися недугуют убо и хулят. Сего ради и иногда инеми прияти ему сопротив различия хулы, якоже тех недугование принуди его. Сими множицею неписаными убо не отчужшими же, яже по писанию благочестивыя мысли, апостолу многажды еллинскими глаголы прияти не отрекшуся, противу своего разума, еще и неписаными иже в Божественном писании принудися. Обаче приличными благочестию глаголы, воздержали недугующих, и возбраняти хулы их. Якова бо ересь в кое время востает, тогда таковых, и словес на возбранение потреба есть. Егда бо убо писанием недугующаго уврачевати возможно, тогда от писания и глаголы предъявляются. Егда же не от писания врачуется недугуя и криверием, тогда не от писания и глаголы ему предлагаются. Всем всячески быти по апостолу, да всяко некли возмощи ко здравию возвати.

5) Зонар с Богом

401 Неведение есть горши согрешения. Ведый аще согрешит, весть о чем каятися. А не ведый творит согрешив не весть о чем каятися. Мнози бо заблудиша не почиташа святых книг, а чтуще, не имея ума совершенна во ересь впадут, без ума погибают.

6) Библия

402 Скипетродержавный пророк Духа Святого исполн, се предваряя глаголет: вразуми мя, рече, и испытаю закон твой. Не просто же, но и сохраню его всем сердцем моим. Знаменай сия словеса со вниманием, и искусно разумей. И отверзи умныя зеница, сердца твоего, и остави тщеславие и самомнительное мудрование, земно, душевно, и бесовска, не свыше сходящее, но грешняя мудрствующе, разумеи словесем господним, яко не просто читати повелевает но и испытывати. Испытавши же, и сохраняти. Могущая же вместити вмещати, невместимая же церкви с верою прилагати, она же не обыче заблуждати. Читание бо письменное умрщвляет, испытание же духовное оживляет. Инако же мудрствующе прельстишася мнози и на пути погибели сташа. Сие же, молю да никого же от чтущих и слышащих ожесточит. Не ко всем бо речеся, но токмо к ненаказаным и неутвержденным, приникшим закону господню утром, в вечер же учителями зваться изволяющим. Искусных же и богоразумных в писаниях Божественных и в добродетелях, прилежно молю: да и аз недостойный от них наказан и исправлен буду. Якоже бо здравии не требуют врача. тако искуснии сицевого возвещания. Но понеже не вси искусни, ниже вси читают с испытанием и вниманием, от них же и заблудиша мнози. Аще убо не верующим повеле Христос испытати писания, обличая их безумие и слепоту. Яко без рассуждения духовного читают телесне, мнят в писаниях живот вечный имети. неразумием же писанием живота отметаются.