И читаем на церковнославянском или русском

Тропарь, глас 8

Се Жених грядет в полунощи, / и блажен раб, егоже обрящет бдяща: / недостоин же паки, егоже обрящет унывающа. / блюди убо душе моя, / не сном отяготися, / да не смерти предана будеши, / и Царствия вне затворишися, / но воспряни зовущи: / Свят, Свят, Свят еси Боже, / Богородицею помилуй нас.

И читаем на церковнославянском или русском

Трипеснец, господина Космы Маюмского, глас 2

Песнь 1.

Ирмос: Непроходимое волнящееся море, / Божиим Своим велением изсушившему, / и пешешествовати сквозе е Израильтеския люди наставльшему, / Господеви поим, славно бо прославися.

Припев: Слава Тебе Боже наш, слава Тебе.

Неизреченное Слова Божия схождение, / еже Христос Тойжде есть Бог и Человек, / еже Бог невосхищением быти непщевав, / внегда воображатися рабом, показует учеником, / славно бо прославися.

Слава, и ныне: Послужити Сам приидох, / Егоже зраком Создатель волею обложен есмь, / обнищавшему Адаму, богатствуяй Божеством, / положити хотяй Мою душу избавление зань, / иже безстрастный Божеством.

Господи помилуй. Трижды

Слава, и ныне.

Кондак, глас 8

Иаков рыдаше Иосифова лишения, / и доблий седяше на колеснице, яко царь почитаемь: / египтяныни бо тогда сластем не поработав, / воспрославляшеся от Ведущаго человеческая сердца, / и Посылающаго венец нетленный.

Икос:

На рыдание ныне приложим рыдание, / и излием слезы со Иаковом, / плачущеся Иосифа приснопамятнаго и целомудреннаго, / порабощеннаго убо телом, душу же непорабощену соблюдшаго, / и Египтом всем царствовавшаго: / Бог бо подает рабом Своим венец нетленный.

Песнь 8.

Ирмос: Устрашися отроков благочестивых, / сообразнаго души несквернаго тела, / и устранися воспитанный в безмерном веществе, / неутружден огнь, / присноживущу же изувядшу пламеню, / вечнующая песнь воспевашеся: / Господа, вся дела, пойте, / и превозносите во вся веки.

Припев: Слава Тебе Боже наш, слава Тебе.

Вас тогда Моих учеников познают вси, аще Моя заповеди соблюдете, / глаголет Спас другом, ко страсти идый: / мир имейте в себе, и во всех, и смиренная мудрствующе возвыситеся: / и Господа знающе Мя пойте, и превозносите во вся веки.

Слава, и ныне: Чина сопротивна вам языческа, да есть держава купнородных: / не жребий бо Мой, мучительство же разум самоизбранный. / Иже убо предызящный в вас быти хотяй других, / да есть всех последнейший: / и Господа знающе Мя пойте, и превозносите во вся веки.

Песнь 9.

Ирмос: Возвеличил еси Христе, рождшую Тя Богородицу, / от Неяже Создателю наш, / в подобострастное нам облеклся еси тело, / наших прегрешений решительное: / Сию ублажающе, вси роди, / Тебе величаем.

Припев: Слава Тебе Боже наш, слава Тебе.

Скверну всю страстную отринувше, / достойный Божественнаго Царствия разум восприимем благомудрственный, / Твоим апостолом предрекл еси, всех Премудросте: / в немже прославитеся, светящеся солнца светозарнее.

Слава, и ныне: Взирающе на Мя, рекл еси Господи Твоим учеником, / не мудрствуйте высокая, но соотведитеся смиренными: / Мою, юже пию, пийте чашу, / яко да во Царствии Отца со Мною прославитеся.

Господи помилуй. Трижды

Слава, и ныне.

Ексапостиларий:

Чертог Твой вижду Спасе мой, украшенный, / и одежды не имам, да вниду вонь: / просвети одеяние души моея / Светодавче, и спаси мя.

 

Стихиры, глас 1:

Припев: Слава Тебе Боже наш, слава Тебе.

Грядый Господь к вольной страсти, / апостолом глаголаше на пути: / се восходим во Иерусалим, / и предастся Сын Человеческий, / якоже есть писано о Нем. / Приидите убо и мы, очищенными смыслы, / сшествуим Ему, и сраспнемся, и умертвимся Его ради житейским сластем, / да и оживем с Ним, и услышим вопиюща Его: / не ктому в земный Иерусалим, за еже страдати, / но восхожду ко Отцу Моему, и Отцу вашему, / и Богу Моему, и Богу вашему, / и совозвышу вас в горний Иерусалим, / в Царство Небесное.

Припев: Слава Тебе Боже наш, слава Тебе.

Глас 5: Достигше вернии спасительную страсть Христа Бога, / неизреченное Его долготерпение прославим: / яко да благоутробием Своим совоздвигнет и нас умерщвленных грехом, / яко Благ и Человеколюбец.

Припев: Слава Тебе Боже наш, слава Тебе.

Господи, к таинству неизглаголанному Твоего смотрения, / не довлеющи сынов Зеведеовых мати, прошаше Тя, / временнаго царства почести дароватися чадом ея, / но вместо тоя, чашу смерти обещал еси пити другом Твоим, / юже чашу прежде сих пити Сам глаголал еси, / грехов очищение. / Темже Тебе вопием: / спасение душ наших, слава Тебе.

Тропарь, глас 8

Се Жених грядет в полунощи, / и блажен раб, егоже обрящет бдяща: / недостоин же паки, егоже обрящет унывающа. / блюди убо душе моя, / не сном отяготися, / да не смерти предана будеши, / и Царствия вне затворишися, / но воспряни зовущи: / Свят, Свят, Свят еси Боже, / Богородицею помилуй нас.

И читаем на церковнославянском или русском